Վստահելի՞ են, արդյոք, բժշկական տնային սարքերը

Համաձայնվեք, որ հաճախ վատ ինքնազգացողության դեպքում անմիջապես չենք դիմում բժշկի, և օգտվում ենք տնային ջերմաչափից, տոնոմետրից, գլուկոմետրից։ Կարո՞ղ են, այդյոք, այսպիսի ինքնահետազոտությունները ճիշտ պատասխանը ստանալու երաշխիք լինել։
Տնային պայմաններում մարմնի ջերմաստիճանի որոշման մատչելի սարքը ջերմաչափն է։

Եթե սնդիկի սյունը բարձրանում է 37 աստիճան և ավելի, դիմում են բժշկի կամ շտապ օգնություն կանչում։ Եթե գլուխը ցավում է, իսկ մարմնի ջերմաստիճանը նորմալ է, անմիջապես մտածում ենք, որ արյան ճնշումը բարձր է կամ ցածր, ուստի դիմում ենք տոնոմետրի օգնությանը։ Վերջերս շուկայում հայտնվել են ճնշման չափման ավտոմատացված և կիսաավտոմատացված բազմապիսի սարքեր, որոնք հարմար են օգտագործման համար նախ և առաջ այն պատճառով, որ կողմնակի օգնության կարիք չի զգացվում, և թվում է, թե շատ հարմար են մենակ ապրող մարդու համար, սակայն դրանք հաճախ «սխալվում են»։ Բանն այն է, որ պատրաստող կազմակերպությունները սարքի ցուցումները կարգավորում են ըստ որոշակի ստանդարտների, այսինքն` նախատեսված է սխալների թույլատրելի մակարդակ։ Բացի այդ, եթե սարքն օգտագործողը անուշադիր է կարդում հրահանգները, կամ մարտկոցների օգտագործման ժամկետը մոտենում է ավարտին ու դրանք լիցքաթափվել են, սարքը կարող է սխալ տվյալներ ցույց տալ, որոնք ճշտելու նպատակով չափումները կատարում են մեխանիկական սարքով։ Էլեկտրոնային տոնոմետր գնելիս պետք է դրա տվյալները ստուգել` համեմատելով մեխանիկական սարքի տվյալների հետ։

Տնային պայմաններում հաճախ օգտագործվող մյուս սարքը գլուկոմետրն է կամ նեբուլայզերը, որի օգնությամբ չափում են գլուկոզայի մակարդակն արյան մեջ։ Օգտագործման կանոնները պարզ ու հասարակ են. մատը դակում են հատուկ դակիչով, արյան կաթիլը դնում թեստ-շերտի վրա, 20-30 վայրկյան սպասելուց հետո սարքի մոնիթորի վրա երևում են տվյալները։ Գլուկոմետրերից շատերն ունեն հիշողություն և տվյալները պահպանում են. վերջին սերնդի սարքերը հնարավոր է միացնել համակարգչին և տվյալներն ինտերնետով փոխանցել բուժող բժշկին։

Ի վերջո, ինչպիսի ժամանակակից և հուսալի սարք էլ որ գնեք, հիշեք այս ասացվածքը. «Ինչը կարող է փչանալ, փչանում է, ինչը չի կարող փչանալ, միևնույն է, նույնպես փչանում է»։ Սարքը կարող է խափանվել և սխալ տվյալներ ցույց տալ ցանկացած ժամանակ, և մարդ ստիպված դրա դիմաց «վճարում է» սեփական առողջությամբ։ Չարժե կուրորեն վստահել սարքավորմանը։ Եթե կասկածներ են առաջացել, դիմեք բժշկի։

Հարցեր, պատասխաններ, մեկնաբանություններ